مهماندار كلوب ايلچيلرى پادشاهك اون طقوز سنه‌ده بناسى تمام اولان سراى جديدينه كوتوردى . اول كيجه خلق خانه و دكانلرنده اول قدر چراغ و شمع ياقمشلر ايديكه اول مقوله شهر عظيمك هرنه طرفنده بر سوزن دوشسه نور و ضيادن بولنمق ممكن ابدى . و پادشاه امراسنه ضيافت ايتمكله چين و ماچين و تلماق و تبت و قامل و قرا خواجه و جورجه و دريابار و سائر ولايتلر اهاليسندن اول كون سرايده يوز بيك مقدارى آدم جمع اولمشدى . سرايك طشره قاپوسندن پادشاهك اوتورديغى يرك دروازه‌سنه وارنجه بيك طقوز يوز يكرمى بش قدم و ايكى جانبى باغلر و سرايلر اولوب مجموع ميدان چينى طوپراغندن مرمر كى هموار يونلمش كرپچلر ايله دوشنلمشيدى . اول كون امراسى پادشاهك تختى اوكنده و ايلچيلر طشره‌ده اوتورديلر . بازيكرلر ناديده و غير مكرر اويونلر اوديلر نصف نهاره دكين مجلس متمادى اولوب بعده هركس خانه‌لرينه كلمكه مأذون اولديلر . حقا كه سراى مزبورده مشاهده اولنان سنك تراشلق و كاشى تراشلق و نجارلق و نقاشلق صنايعنى تمام بلاد خراسان استادلرى ياپمغه قادر دكللردر . پادشاهك هر سنه بر قاج كون لحوماتدن بر شى تناول ايتميوب و حرمنه كيرميوب و ياننه كيمسه‌يى قومايوب خداى آسمانه عبادت ايدرم ديو خارج شهرده ايچنده پت و صورت ياپلمش بر خانه‌ده زعمنجه عبادت ايتمك